انگلینڈ وزیراعظم کا بڑا بیان پاکستان ریڈ لسٹ سے باہر ہو رہا؟ خوشخبری

برطانوی وزیراعظم بورس جانسن نے پاکستان کوکورونا سے متاثرہ ممالک کی ریڈلسٹ سے نکالنے کا اشارہ دیا ہے۔ بورس جانسن نے معروف برطانوی ملٹری اکیڈمی 'رائل ملٹری اکیڈمی سینڈھرسٹ' میں پاسنگ آؤٹ پریڈ کی تقریب میں پاکستانی ہائی کمشنرمعظم احمد خان اور دیگر سےگفتگو کرتے ہوئے پاکستان کو ریڈ لسٹ سے نکالنےکا اشارہ دیا۔

 برطانوی وزیراعظم کا کہنا تھا کہ وہ پاکستان کو ریڈ لسٹ سےنکالنےکےلیے اعداد وشمار کاجائزہ لے رہے ہیں۔ بورس جانسن کے بیان سے اس بات کا قوی امکان ہےکہ پاکستان چند ہفتوں میں ریڈ لسٹ سے باہر آجائے۔ ذرائع کے مطابق پاکستانی وفد کی جانب سے ریڈ لسٹ میں پاکستان کا نام ہونے اور اس سے پاکستانیوں کو درپیش مشکلات کا معاملہ اٹھایا گیا جس کے بعد برطانوی وزیراعظم نے یہ بیان دیا ہے۔ بورس جانسن نے یقین دلایا کہ برطانوی حکومت اعدادو شمار اور سائنسی بنیادوں پر معاملےکا جائزہ لے رہی ہے۔ 

 ذرائع کا کہنا ہےکہ برطانوی وزیراعظم کا کہنا تھا کہ وہ پاکستانی وزیراعظم عمران خان کے جلد دورہ برطانیہ کے منتظر ہیں جس پر پاکستانی وفد نے بتایا کہ ان کا ملک بھی آپ کے دورے کا منتظر ہے ، بورس جانسن کا کہنا تھا کہ حکومت اس حوالے سے تمام امکانات پر غور کررہی ہے۔ خیال رہےکہ برطانیہ کی جانب سے پاکستان کو کورونا کی نئی ریڈلسٹ میں برقرار رکھا گیا ہے جب کہ کورونا سے بری طرح متاثر اور ڈیلٹا ویرینٹ کے گڑھ بھارت کا نام اس فہرست سے نکال دیا گیا ہے۔ ریڈ لسٹ میں نام ہونےکے باعث پاکستان سے برطانیہ جانے والوں کو ہوٹل میں قرنطینہ کرنا ہوگا ۔ 12 اگست سے ریڈلسٹ میں شامل ممالک سے آنے والوں سے قرنطینہ کی مد میں زائد رقم وصول کی جائےگی، ایک بالغ شخص کے قرنطینہ کے اخراجات 1750 سے بڑھ کر 2 ہزار 285 پاؤنڈ ہوجائیں گے جب کہ دوسرے بالغ شخص کے لیے 1430 پاؤنڈ ادا کرنا ہوں گے۔